АВАРГА МАЛЧДЫН УУЛЗАЛТ ЗОХИОН БАЙГУУЛАГДЛАА.

Улс, аймаг, сумын аварга малчдын уулзалт арга хэмжээ 2023.04.25-ны өдөр хөтөлбөрийн дагуу амжилттай зохион байгууллагдлаа. Уулзалтын эхэнд сумын Засаг дарга аварга малчдад цаг үеийн мэдээлэл болоод 2022 онд хийж хэрэгжүүлсэн ажлын товч тайланг танилцууллаа. Хөтөлбөрийн дагуу сумын “Аварга малчдын холбоо” ТББ-ыг шинээр байгуулж, оноосон нэрийн сонголтууд, үйл ажиллагааны чиглэл, хураамжын хэмжээ зэрэг асуудлуудыг хэлэлцэн баталж хөдөөгийн 3 багаас тус бүр 3 малчдын төлөөлөл бүхий тэргүүлэгчдээ сонголоо. Тэргүүлэгчдэд Цагаанхад багийн Монгол Улсын аварга малчин Д.Цэнджав, Аймгийн хошой аварга малчин Л.Долгоржав, Сумын сайн малчин Э.Мөнх-Эрдэнэ, Аманшанд багийн Улсын аварга малчин Б.Цэнгэлмаа, Аймгийн аварга малчин, алтан унаганы эзэн М.Амаржаргал, Сумын аварга малчин С.Ганпүрэв, Аймгийн аварга малчин Н.Эрдэнэбаатар, Сумын аварга малчин С.Соронзонболд, Ц.Ууганбаатар нарын 9 хүний бүрэлдэхүүнтэй сонгогдсон. Улмаар ТББ-аа улсын бүртгэлд бүртгүүлэх, гэрчилгээ, тамга тэмдгээ авах ажлыг зохион байгуулж ажиллахаар төлөвлөсөн. Мөн уулзалтын үеэр ирэх онд тохиох сумын 100 жилийн ойг угтсан бэлтгэл хангах, бүтээлч ажлыг өрнүүлэх аяны хүрээнд зохион байгуулахаар төлөвлөсөн Аваргуудын нэрэмжит “Дэлгэрэх 100” цэцэрлэгт хүрээлэнгийн төслийг танилцуулж, малчдаар хэлэлцүүлэн, санал бодлоо нээлттэй солилцлоо. Арга хэмжээний төгсгөлд уулзалтад хүрэлцэн ирсэн нийт аварга малчдыг 4 багт хуваан гар бөмбөг, олс таталт, буухиа тэмцээнүүдийг зохион байгуулж ялагчдыг тодруулсан бол орой нь аварга малчдад зориулсан үдшийн цэнгүүнийг Соёл, спортын төвөөс санаачлан зохион байгуулсан байна.