ЗОЛБИН НОХОЙ, МУУРЫГ ХОТ, СУУРИН ГАЗАРТ ГАЛТЗЭВСЭГ АШИГЛАН УСТГАХ ЖУРАМ

Нэг.Нийтлэг үндэслэл

1.1.Дорноговь аймгийн нутаг дэвсгэрт сумдын Засаг дарга, Засаг даргын Тамгын газраас золбин нохой, муурыг сумын төв, суурин газарт галт зэвсэг ашиглан устгах ажлыг зохион байгуулахтай холбоотой харилцааг энэхүү журмаар зохицуулна;

1.2.Галт зэвсгийн тухай хуулийн 11 дүгээр зүйлийн 11.2 дахь хэсэгт заасны дагуу тухайн сумын Засаг дарга золбин нохой, муурыг сумын төв, суурин газарт галт зэвсэг ашиглан устгах шийдвэр гаргана;

1.3.Аймгийн нутаг дэвсгэрт сумын төв, суурин газар буюу Сайншанд суманд хариуцах эзэнгүй золбин нохой, муурыг галт зэвсэг ашиглан Галт зэвсгийн тухай хууль, энэхүү журмын дагуу устгана;

1.4.Золбин нохой, муурыг галт зэвсэг ашиглан устгах ажлыг сумдын Засаг даргын Тамгын Газар хариуцан зохион байгуулж, аймгийн Цагдаагийн газар, Мал эмнэлгийн газар, Байгаль орчин, аялал жуулчлалын газар тус тус хяналт тавина;

1.5.Энэхүү журамд хэрэглэсэн нэр томьёог Галт зэвсгийн тухай хууль, Хот, тосгоны эрх зүйн байдлын тухай хууль, Мал, амьтны эрүүл мэндийн тухай хууль, Байгаль орчныг хамгаалах тухай хуульд заасан утгаар ойлгож, холбогдох бусад хууль тогтоомж, стандартыг мөрдлөг болгоно;

Хоёр.Золбин нохой, муурыг устгах иргэнд тавигдах шаардлага

2.1.Золбин нохой, муурыг устгах иргэн нь Галт зэвсгийн тухай хуулийн 9 дүгээр зүйлийн 9.1 дэх хэсэгт заасан 21 нас хүрсэн, иргэний эрх зүйн бүрэн чадамжтай, галт зэвсэг ашиглаж гэмт хэрэг санаатай үйлдэж байгаагүй, галт зэвсэг эзэмших, ашиглах, хадгалах аюулгүй ажиллагааны сургалтад хамрагдаж гэрчилгээ авсан Монгол Улсын иргэн байна;

2.2.Иргэн нь мөн хуулийн 9 дүгээр зүйлийн 9.2 дахь хэсэгт заасны дагуу галт зэвсгээ бүртгүүлж, галт зэвсгийн гэрчилгээ авсан байна;

Гурав.Сумын Иргэдийн Төлөөлөгчдийн хурлын эрх, үүрэг

3.1.Золбин нохой, муурыг устгах талаар зохион байгуулсан сумын Засаг даргын ажлын тайланг хэлэлцэх, гүйцэтгэлд хяналт тавих;

3.2.Сумын Засаг даргын саналд үндэслэн золбин нохой, муур устгах ажилд шаардагдах төсвийг батлах, нохой, муур устгах үнэлгээг тогтоох;

Дөрөв.Сумын Засаг даргын Тамгын газрын эрх, үүрэг

4.1.Сумын төв, суурин газрын золбин нохой, муурны судалгааг жил бүр гаргаж, устгах тоог тогтоож, холбогдох мэргэжлийн байгууллага (Мал эмнэлгийн газар, Байгаль орчин, аялал жуулчлалын газар)-д танилцуулах;

4.2.Золбин нохой, муурыг галт зэвсэг ашиглан устгах ажлыг жилд хоёроос доошгүй удаа шаардлагатай тохиолдолд тухай бүрд нь зохион байгуулах;

4.3.Сумдын Засаг даргын Тамгын газар, Сайншанд сумын Захирагчийн алба нь Галт зэвсгийн тухай хуулийн 9 дүгээр зүйлийн 9.1 дэх хэсэгт заасан шалгуурыг хангасан мэргэшсэн, туршлагатай иргэн эсхүл тэдний оролцоотой баг, хуулийн этгээдийг сонгож, тухайн “Сумын төв, суурин газарт золбин нохой, муурыг галт зэвсэг ашиглан устгах гэрээ” байгуулан золбин нохой, муурыг галт зэвсэг ашиглан устгах ажлыг гүйцэтгүүлэх;

4.4.Журмын 4.3-т заасан гэрээнд золбин нохой, муур, гоц халдварт өвчин бүхий мал, амьтныг устгахад ашиглах галт зэвсэг нь Галт зэвсгийн тухай хуулийн 5 дугаар зүйлийн 5.2-т заасан шалгуурыг хангасан, жил бүр тооллогод хамруулсан, сумыг холбогдох зөвшөөрөл бүхий газраас худалдан авах, аюулгүй байдлыг хангах талаар болон бусад асуудлыг харилцан тохиролцож тусгах;

4.5.Гэрээнд заасны дагуу иргэнд устгасан золбин нохой, муур, мал, амьтан нэг бүрд ногдох мөнгөн урамшууллыг олгох;

4.6.Устгасан золбин нохой, муурыг хууль тогтоомжид өөрөөр заагаагүй бол хүн амын суурьшлын бүсээс хол, хогийн цэг, бусад зориулалтын газарт зөөвөрлөж булж устгах, халдваргүйжүүлэх арга хэмжээ авах;

4.7.Устгалын тайланг хагас, бүтэн жилээр гаргаж аймгийн Засаг даргын Тамгын газар, Цагдаагийн газарт тус тус хүргүүлэх;

4.8.Золбин нохой, муурыг устгах гэрээ байгуулсан иргэн, хуулийн этгээдийн талаарх мэдээллийг аймгийн Цагдаагийн газарт нэн даруй гарган өгч, аюулгүй байдлын баталгаа, зааварчилгаа авах;

4.9.Иргэдэд эртнээс мэдээлэл хүргэж устгалын цагаар хүн, хүүхдийн хөдөлгөөнийг зохицуулах;

Тав.Багийн Засаг даргын эрх, үүрэг

5.1.Багийн нутаг дэвсгэр дэх золбин нохой, муурыг устгуулах саналаа гаргах, хамтран зохион байгуулах;

5.2.Золбин нохой, муурны тоо, судалгааг гаргаж сумын Засаг даргын Тамгын газарт хүргүүлж байх

5.3.Хууль тогтоомжийн хүрээнд аймаг, сумын Иргэдийн Төлөөлөгчдийн Хурал, Засаг даргын тогтоосон тэжээвэр нохой, муур, амьтны татвар, төлбөр, хураамжийг төлүүлэх ажлыг багийн хэмжээнд зохион байгуулах;

Зургаа.Цагдаагийн газрын эрх, үүрэг

6.1.Аймгийн сумдын төв, суурин газарт галт зэвсэг ашиглан золбин нохой, муурыг устгах ажилд мэргэжил, арга зүйн зөвлөгөө өгөх, журмыг хэрэгжүүлэх ажилд хяналт тавих;

6.2.Галт зэвсгийн тухай хуулийн 9 дүгээр зүйлд заасан шаардлагыг хангасан иргэнийг гэрээгээр ажиллуулж буй эсэхэд хяналт тавих;

6.3.Иргэн, хуулийн этгээдэд холбогдох хууль тогтоомж болон галт зэвсэг, ангийн хэрэгсэлтэй ажиллах аюулгүй ажиллагааны зааварчилгааг өгч ажиллах, биелэлтэд хяналт тавих;

6.4.Иргэн, хуулийн этгээдийн үйл ажиллагаанд шалгалт хийж, илэрсэн зөрчил, дутагдлыг арилгуулах, шаардлагатай гэж үзвэл гэрээг цуцлах саналыг холбогдох байгууллагад хүргүүлэх;

6.5.Аймгийн хот, суурин газар (сумын төв)-т галт зэвсэг ашиглан золбин нохой, муурыг устгах гэрээ, галт зэвсэг, сумны талаарх мэдээлэл (бууны гэрчилгээ, зохих зөвшөөрөл бүхий газраас сум, хэрэгсэл худалдан авсан тухай баримт гэх мэт), бусад бичиг баримтыг шалгах, танилцах, хяналт тавих;

6.6.Иргэн, хуулийн этгээдэд энэхүү журмаар хүлээсэн үүргээ хэрэгжүүлэн ажиллах талаар Мэдэгдэл хүргүүлэх, биелэлтийг тооцох;

6.7.Устгалын тайланг хагас, бүтэн жилээр гаргуулан авах;

Долоо.Сайншанд сумын Захирагчийн ажлын албаны газрын эрх, үүрэг

7.1.Галт зэвсгийн тухай хуулийн 9 дүгээр зүйлд заасан шаардлагыг хангасан иргэн ажиллуулах үүрэгтэй;

7.2.Золбин нохой, муурыг устгах ажлыг Сайншанд сумын Засаг даргатай хамтран зохион байгуулах;

7.3.Устгасан золбин нохой, муурыг хууль тогтоомжид өөрөөр заагаагүй бол хүн амын суурьшлын бүсээс хол, хогийн цэг, бусад зориулалтын газарт зөөвөрлөж булж устгах арга хэмжээ авах;

7.4.Иргэн, хуулийн этгээдэд агнасан устгасан амьтан нэг бүрд ногдох мөнгөн урамшууллыг олгох;

Найм.Иргэн, хуулийн этгээдийн эрх, үүрэг

8.1.Золбин нохой, муурыг устгах ажлыг гэрээ байгуулан гүйцэтгэх, холбогдох санхүүжилт, урамшууллыг авах;

8.2.Агнах арга, цаг хугацаа, техник хэрэгслээ орон нутгийн онцлог, нөхцөл байдалд тохируулан зөв сонгох, золбин нохой, муурыг устгах үйл ажиллагааг аюулгүй байдлыг бүрэн хангасан тохиолдолд явуулах, (Дуу намсгагчтай дурантай буу ашиглах, хүүхэд, хүн харах боломжгүй байршилд буудлага үйлдэх);

8.3.Устгалын ажил явуулахын өмнө нутаг дэвсгэр хариуцсан цагдаагийн байгууллагад биечлэн ирж холбогдох гэрээ, галт зэвсэг, сумны талаарх мэдээлэл (бууны гэрчилгээ, зохих зөвшөөрөл бүхий газраас сум, хэрэгсэл худалдан авсан тухай баримт) бусад бичиг баримтыг танилцуулж, аюулгүй ажиллагааны зааварчилгаа заавал авах;

8.4.Агнасан золбин нохой, муурыг цаг тухай бүрд нь хүлээлгэн өгч холбогдох тооцоог хийх, устгалын ажлын тайланг сумын Засаг даргын Тамгын газарт тухай бүр гаргаж өгч байх;

Ес.Иргэний үүрэг

9.1.Нохой, муурыг вакцинжуулах, мал амьтнаас хүнд халдварладаг өвчнөөс урьдчилан сэргийлэх арга хэмжээг авах;

9.2.Нохой муурыг зэрлэгшүүлэхгүй байх;

9.3.Нохой муурыг хараа хяналтад байлгаж, бусдад гэмт хор учруулахгүй байх,

9.4.Тэжээвэр амьтан нохой, муурыг хүзүүвчтэй байлгах;

9.5.Нохой, муур, мал, тэжээвэр амьтныг тэнэмэл, золбин болгох, хаяж гээхгүй байх,

9.6.Золбин нохой, муурны талаарх мэдээллийг сум, багийн Засаг даргад мэдэгдэж байх;

9.7.Хууль тогтоомжийн хүрээнд аймаг, сумын Иргэдийн Төлөөлөгчдийн Хурлаас тогтоосон тэжээвэр нохой, муур, амьтны татвар, төлбөр, хураамжийг холбогдох хугацаанд нь төлөх;

Арав.Санхүүжилт

10.1.Золбин нохой, муурыг устгах ажилд шаардагдах зардлыг орон нутгийн төсөв (Байгаль орчныг хамгаалах сан бусад)-өөс санхүүжүүлнэ.

Арван нэг.Хариуцлага

11.1.Хууль тогтоомж болон гэрээгээр хүлээсэн үүргээ биелүүлээгүй байгууллага, албан тушаалтан, хуулийн этгээд, иргэн холбогдох хуулийн дагуу хариуцлага хүлээнэ.

11.2.Иргэн, хуулийн этгээд гэрээгээр хүлээсэн үүргээ хангалтгүй биелүүлсэн, галт зэвсгээр сум алдаж бусдын амь нас, эрүүл мэнд, эд хөрөнгөд хохирол учруулсан бол холбогдох хууль тогтоомжид заасны дагуу хариуцлага хүлээнэ.